創業通 : 港製食玩 殺過日本

創業通 : 港製食玩　殺過日本

人愈大愈鍾意買玩具，因可重拾童真，但活在不夠一百呎的家居內，根本容不下無限的購物慾。不得不佩服日本人的聰明，能設計出迷你食玩，還想到用靚靚包裝盒將玩具包起。相信不少人都對這玩意迷，而記者就試過買齊全套便利店系列，在細小房間內砌小玩具。
近年興的食玩多數以日本食物為題材，近日發現兩套新出的「茶餐廳」和「囍宴」系列，竟然出自香港本地設計！而這套極具香港特色的食玩更已紅到去日本。每套總投資近百萬，約有30萬利潤，算唔錯喇！
日本的「食玩」正統意思是「附有贈品的糖果」，本來零食是主角，玩具只是吸引人買的小禮物，但兩三年前日本的食玩題材變得多樣化，任何日本的傳統食物、超市、便利店都可變成小擺設，吸引不少女性顧客。加上其手工精細，又與扭蛋擁有異曲同工之妙，吸引人努力從密封的包裝盒，挑選自己的心水玩具，帶點尋寶的刺激，難怪愈來愈受歡迎。
伍先生於旺角兆萬商場，開設專賣多啦A夢玩具專門店「Trendy Point」已7年，他樣貌雖與多啦A夢一樣老實，卻絕不會被大雄搵笨，相反他是首個看準生產食玩的香港人，先於06年中成功開發第一個「香港茶餐廳」系列，在06年尾再推出「囍宴」系列，貨品不但在崇光百貨有得賣，連「買物王」、「奇趣天地」等連鎖玩具店都見這個本地創作放在日本出品的食玩旁邊，銷量更不比東瀛貨差。

茶餐廳有親切感
「我見日本食玩流行幾年，通常都係出日本食物，如拉麵、壽司、蛋糕等，好少有香港食物，而且就算日本人要出香港食品，實唔神似。我出食玩時，已希望可以打入日本市場，我覺得茶餐廳最能代表香港，而日本人又好鍾意茶餐廳，所以兩年前我就開始構思『香港茶餐廳』食玩系列。」伍先生說。
要做茶餐廳食物，便要做資料搜集，伍先生先去茶餐廳點了所有有代表性的食品，如西多士、蛋撻及紅豆冰等，再自己影相，然後將圖片交畀製造廠起辦，起辦過程大約要個半月。但初辦起碼要改三四次，便可正式做模，需時約多三個月。最後檢查過冇問題，就可以正式生產，要兩個月才可起貨，所以整個生產工序要半年以上。

香港賣贏日本貨
「茶餐廳」系列投資近一百萬，生產數目約兩萬套（每套有10小盒，共10款不同玩具），每套成本價約$50，而零售價為$220一套。「為減少砸貨量，我批貨開始生產時，已經叫sales個辦畀唔同玩具鋪睇，睇有冇人訂貨。搵買家時一定要搵有賣開食玩鋪頭，佢賣開日本Re-Menrt食玩，已有客源，加我貨入去會較易賣。」
沙田區「買物王」高級售貨員Herman表示：「『茶餐廳』系列好好賣，可能因為好多人見係香港食品，好有親切感，所以由3至80歲都會買。由上年9月至12月，我三間分店加埋已賣出15大箱貨，每大箱有12套食玩，即總共賣180套。至於『囍宴』系列，由12月開始，已賣出2大箱貨，共24套，買人年紀較大，多數係三十歲以上，佢買親都係成套買，尤其以新年後反應最好，最勁一日賣4套。相比其他日本出品，通常一間鋪3個月先賣2至4套，香港貨好賣好多。」
將軍澳新都城3期「奇趣天地」玩具部主管阿偉亦說：「好多人知道呢套食玩係香港人出，就算冇買開食玩，都會買埋一份，最多人因為西多士而買『茶餐廳』，而『囍宴』發光乳豬最多人鍾意。單係我呢間鋪，半年內已經賣6大箱『茶餐廳』，即總共賣72套；而『囍宴』賣兩個月，都已經賣4箱貨，即48套。」

玩具展擺檔招日本買家
除了本地大賣外，原來這兩套香港食玩已打進日本市場，「茶餐廳」有一半貨量在日本發售，三個月已售清，而「囍宴」則銷量達二百大箱，即已賣出2,400套。想打進日本市場，伍先生建議到香港玩具展擺攤位，「雖然日本有玩具批發商（其中一間叫「大黑屋」，類似香港瑞華行），但如果我主動問佢買唔買我貨，就好似係我去求佢，佢梗係會壓我價，冇咁好賺，如果我價錢太高，佢可以選擇搵廠生產類似貨，因為奶茶蛋糕等食物冇版權，人人都出得。
「當時我預計06年中推出『茶餐廳』系列，批貨未正式生產，只係做貨辦，06年1月時我就去玩具展擺攤位。個展覽係專為外國買家而設，可以即時知道市場反應，如果反應唔好，可以停止生產或者減低生產數量。結果我遇到日本『童友社』貨，佢再批發畀日本唔同玩具鋪，因為佢貨數量夠大（超過一萬套），最後決定淨係同佢一間公司合作，亦可以即時收到一大錢，如果等資金周轉，咁樣批貨畀人最適合。
「到我06年尾出『囍宴』系列，07年1月我又玩具展擺檔，吸引到唔少買家有興趣，落實入貨有十幾個，包括日本同台灣客。因為上一次只係將貨批畀『童友社』，貨量大所以折扣較低，賺得冇咁多，到『囍宴』系列，決定批貨畀唔同日本公司，批貨數量較少，但批價冇咁低，約比之前批畀『童友社』高20至30%，但每次要自己寄貨同收數，唔似之前有『童友社』搞掂晒咁方便，亦預計要一年至回本。」

教你40萬生產食玩
你都想學伍先生出食玩打入日本市場，以生產5千套（每套10盒）為例，原來唔使40萬，如果成功以每盒$18批發價全部賣出，即有$90萬營業額。

Step 1︰搵廠整貨
很多新手在找國內工廠造貨時毫無門路，其實香港有不少公司可替客人找工廠造貨，如「Top Creation」就是其中之一。行政經理Alex說：「只要畀個設計我，就可以幫你搵廠造玩具、衫、手表，如果要造食玩，畀相我就可以叫廠跟住做。每一件配件起模費約3千蚊，一個配件最少生產5千件，每個配件生產5千件連模費共$18,000。」

假設一套玩具共有20個配件
花費：$18,000×20=$360,000
查詢：Top Creation（Asia）Limited 27237306

Step 2︰印包裝盒
密封包裝盒係食玩必備條件，記者拿「囍宴」食玩向「紙袋王」銷售主任Ringo問價，「細盒用250gm粉灰咭，大盒用400gm粉灰咭，表面令面要做UV Coating，印5千個大盒，要$1.7一個，呢個價已包埋盒面die cut位，刀模唔使額外加錢，而5萬個細盒就$0.23一個。價錢已包運費，一星期交貨，訂貨時先付印刷費一半，收貨時再付餘數。」

花費：$1.7×5,000個（大盒）＋$0.23×50,000個（細盒）＝$20,000
查詢：紙袋王81099168
總投資：$380,000

Step 3︰搵香港銷售途徑
伍先生請位行街sales幫佢將貨推銷畀唔同玩具鋪，薪金約兩萬。如「奇趣天地」玩具部主管阿偉說：「我歡迎本地設計玩具擺我鋪頭賣，可以直接新都城3期分店搵我傾。」
伍先生另外找了一間公司，幫他放了「茶餐廳」和「囍宴」系列在崇光售賣，因普通公司很難在崇光開鋪，他不肯透露該公司資料，但記者從放在崇光發售的「茶餐廳」食玩上，找到發貨公司「Gordon Development LTD」的聯絡電話，其實可以留意食玩盒上的資料，便找到發貨商幫你批貨。

查詢：Gordon Development LTD 28975002

Step 4︰搵日本代理商
除玩具展外，香港亦有玩具公司把玩具打入日本市場，例如之前曾將鐵人兄弟的12吋Action Figure推廣到日本的「Hot Toys」，其Marketing Manager陳小姐說：「先要做一份計劃書，詳細列明貨品設計概念、構思等，並附上貨辦，再由我同日本玩具公司present，睇佢覺得唔當地市場，先決定幾多貨。」
她說食玩數量較大，通常會以寄賣形式售賣，例如首次拿了2,500盒食玩到日本7-11，首月賣了500盒，設計師便可收到該500盒的貨款；若3個月後合作期結束，所有剩貨便會退給設計者。「我會先同設計者傾好MOQ（最低賣出數量）去保障佢，亦會抽取10%-20%作佣金。」
如你寄賣2,500套（共25,000盒）往日本，全部售罄，以每盒賣$25及抽佣10％計。

抽佣：$25×25,000×0.1=$62,500
查詢：Hot Toys 28363295/ www.hottoys.com.hk

出漫畫人物要有版權
「我兆萬開鋪七年，只賣多啦A夢貨品，所以呢兩套『茶餐廳』同『囍宴』食玩冇放落鋪度賣，驚貨唔夾，而且貨有批畀同場玩具鋪，如果我賣平，就唔會有人同我貨。雖然我好鍾意多啦A夢，但要出佢食玩要先版權，即要先畀版權費，就算到版權出食玩，都只可以香港賣，市場咁細，唔似我自己設計同生產『茶餐廳』同『囍宴』系列咁，因為食物本身冇版權，可以出口去唔同國家，市場大好多。」
想生產多啦A夢等來自動畫、漫畫角色的商品，一定要先申請版權，如果打算在日本售賣，仲要申請香港同日本兩地的版權，即是要付兩筆版權費。如想申請多啦A夢香港區版權可向國際影業有限公司查詢（電話25751520），而日本版權可參閱網頁http://license.shopro.co.jp。

玩具展資料
玩具展每年一月舉行，伍先生說租一個攤位要約三萬多元。下一屆要到08年1月7日至10號，今年4月尾開始接受報名，只需上貿發局網頁下載表格，再連同商業登記及貨品目錄一併遞交。08年租用攤位價目未定，將在四月尾公布，而07年玩具展最平的9平方米標準攤位租金為$25,821，詳情可瀏覽www.hktoyfair.com。

「茶餐廳」食玩每月盈利
伍先生話有意做食玩人，要有心理準備唔會即時回本，通常要半年至一年時間，而「茶餐廳」系列要賣八個月至將貨賣晒。

每月盈利表（以06年7月為例）
營業額：$210,000
貨本：$140,000
售貨員人工加貨品運輸費：$25,000
寫字樓租金：$10,000
利潤：$35,000(8個月銷售期即共賺約28萬)

T For Candy Workshop
地址：旺角兆萬商場105號鋪／21368012