商機收料站 : 迪士尼請大量暑期工

商機收料站 : 迪士尼請大量暑期工
暑假就到，除各會考生外，好多中學及大學生都開始搵暑期工，不過亂咁搵工，好易誤墮陷阱，如果入大集團做，就唔怕俾人呃，仲可以儲多工作經驗添。好似迪士尼今個暑假，就會聘請超過50位夏季短期工作人員，應付暑期人流。 到底迪士尼會請咩職位，以及有咩入職要求呢？我發錢韓第一時間問迪士尼招聘經理郭綺華小姐，佢話今次主要請3個範圍職位，包括樂園營運部、商品銷售服務部及餐飲服務部門，三者都會請款待專員，負責遊樂設施日常運作、招待賓客等；而餐飲服務部仲會請埋餐飲服務助理、廚房助理及管事清潔員，主要係各餐廳招待賓客，協助廚師清洗食物等。至於人工方面，每個職位都唔同，月薪最低約由$6,660起至$9,000不等。要有良好語文能力郭小姐表示暑期工申請者毋須經驗，但要有良好廣東話、英語及普通話能力，「因為我同事要面對唔同國籍遊客，所以語言有一定要求，我會面試時，以3種語言同應徵者溝通。」面試一般會以單對單形式進行，講對迪士尼感覺、工作寄望等。「最緊要保持笑容同禮貌，因為呢兩樣對我公司講好重要。同埋應徵者最好捱得苦，因為好多job都要戶外工作，夏天都幾曬，同埋要輪班工作，就算週末或者公眾假期都要返工，所以大家最好有心理準備。」獲聘後，應徵者跟長工一樣，會被安排入Disney University，接受2日training，介紹迪士尼各部門運作，工作範圍，公司架構及規矩等。如果應徵者做完暑期工後，有興趣成為正式員工，雖然亦要依正常途徑再申請職位，但就會比其他人優勝。「因為佢已經接受過training，會比較熟悉公司運作，加上親身做過一段時間，證明佢係鍾意份工先申請，畀到人信心，唔會覺得佢玩玩。其實我之前都有唔少暑期工，第二年又會申請，甚至有畢業生，試做過之後申請做長工。」夏季短期工作期由6月至9月底，由5月開始招聘，不設截止日期，有興趣就快登上迪士尼的網站申請喇！查詢網頁：http://www.hongkongdisneyland.com/discover/career.html